روعة البداية

روعة البداية

من يتذكر بداية دخول المدرسة اول يوم اشلون كنا فرحانين بالثوب/المريول الجديد والشنطةالجديدة

تذكرون اول شهادة بصف اول اشلون كانت فرحتنا فيها راجعين البيت ركض نبي نرويها اهلنا

اللي يسوقون سيارات تذكرون الفرحة باول يوم سقنا سيارة ولا اول يوم استلمنا الرخصة (اذكر ذاك اليوم قعدت الف بالشوارع ابي اشوف سيارة مرور عشان يوقفني ويقول لي جيب الرخصة عشان احطها بكل خيلاء بعينه بس للاسف بالذات ذاك اليوم ما اشتغلوا)

تذكرون اول يوم خذنا شهادة الثانوي واول يوم تخرجنا من الجامعة تذكرون الفرحة اللي ما توصف والحفلات اللي صاحبت التخرج والفرح

طيب اللي عاشوا شهر العسل واللي الى الحين هم ناقعين بشهر العسل شهر الحب والحنان يذكرون البداية لاحلىواجمل واعذب علاقة في العلاقات الانسانية

تذكرون اول يوم ارتبطتوا فيه بتؤام روحكم ونصفكم الثاني اللي الواحد يصبح ويمسي ينام ويصحى على سيرة توأمه
تذكرون تلك الروعة وجنانها وكم تمنيتوا تكون العلاقة كلها شهر عسل ما ينتهي

تذكرون هذي البدايات وغيرها وغيرها واللي كانت محطات بحياتنا من اروووع المحطات واللحظات

لكن سؤالي ليه تلك البدايات يغيب بريقها بعد فترة من الزمن؟
ليه ما يكون بحياتنا تجديد واحتفال بعد كل فترة بكل بداية من هذي البدايات؟
ليه نقول خلاص هذي سنة الحياة ان الاشياء واللحظات الحلوة لازم يجيها يوم وتموت او تبرد
من قال هذا الكلام ؟ في نص ولا دليل على ان هذه هي سنة الحياة ؟

لو اخذنا بداية من هذي البدايات كمثال ونطبق عليه باقي البدايات:

مثلا بداية شهر العسل بداية الحب الجديد في حياتنا
من يستغني عن انه يعيش على طول في ظل انسان يحس فيه ويشعر فيه بنفس المشاعر والاحاسيس اللي كانت باول يوم ارتباط ؟؟

من يستغني عن شريك بحياته ارواحهم دائما قريبة من بعضها اقصد بالتعبير مو بس بالروتين القاتل. ليش ما نحتفل مو كل سنة كل يوم ونتذكر اول يوم واول بداية لنا عشان نعيش العمر كله عسل في عسل

هذي كلمات دارت في بالي اليوم عن رووعة البدايات اللي جنينا عليها بكلمة هذي طبيعة الحياة انها تذبل وطبيعة الحياة تخلينا ننسى البدايات الرائعة

ما رايكم انتم برووعة البدايات ؟؟؟؟

انا اخالف الكل واقول روعة البداية لازم تسري بدمنا وتستمر الى مالانهاية